✍️ रामकृष्ण बोरुले (लोकवाणी आवाज)
🌐 २२ डिसेंबर २०२५
पोरला येथे आज सकाळी 11 वाजताच्या सुमारास गडचिरोली–आरमोरी या मुख्य मार्गावर शालेय विद्यार्थ्यांसह गावकऱ्यांनी बस रोको आंदोलन केले. पोरला हे गडचिरोली तालुक्यातील सर्वात मोठे गाव असून येथे सुपर बसचा अधिकृत थांबा आहे. मात्र काही सुपर बस चालक पोरला येथे गाडी थांबवत नसल्यामुळे विद्यार्थ्यांना व नागरिकांना मोठ्या अडचणींना सामोरे जावे लागत आहे.
आरमोरी व गडचिरोली येथे शिक्षण, शासकीय कामकाज तसेच इतर महत्त्वाच्या कामांसाठी जाताना अनेक वेळा उशीर होत असल्याने नागरिकांमध्ये तीव्र नाराजी व्यक्त होत होती. याच पार्श्वभूमीवर विद्यार्थ्यांनी आणि गावकऱ्यांनी एकत्र येत बस रोको आंदोलन केले.
आंदोलनाची माहिती मिळताच गडचिरोलीचे तहसीलदार श्री. सागर कांबळे, गडचिरोली पोलीस स्टेशनचे ठाणेदार श्री. विनोद चव्हाण तसेच गडचिरोली बस डेपोचे आगार व्यवस्थापक श्री. प्रफुल डहारे हे घटनास्थळी दाखल झाले. अधिकाऱ्यांनी विद्यार्थ्यांच्या व गावकऱ्यांच्या मागण्या ऐकून घेत योग्य ते मार्गदर्शन केले.
यानंतर आंदोलन शांत करण्यात आले व वाहतूक सुरळीत करण्यात आली. आंदोलन चिघळू नये यासाठी पोलीस बंदोबस्तही तैनात करण्यात आला होता.
निष्कर्ष
प्रशासनाने नागरिकांच्या मागण्यांची दखल घेतल्याने आंदोलन शांततेत मागे घेण्यात आले असून, पुढील काळात सुपर बस थांब्याबाबत सकारात्मक निर्णय होण्याची अपेक्षा नागरिकांनी व्यक्त केली आहे.
