✍️ लोकवाणी आवाज टिम
📅 १८ मार्च २०२६
 |
| गडचिरोलीत प्रस्तावित खनिज वाहतूक रस्त्याचे काम; डोंगराळ भागात यंत्रसामग्रीद्वारे सुरू असलेली कामे (प्रतिनिधी छायाचित्र) |
गडचिरोली जिल्ह्यातील खनिज वाहतूक सुरळीत करण्यासाठी राज्य शासनाने मोठा निर्णय घेतला आहे. नवेगाव मोरे-कोनसरी-मुलचेरा-हेडरी ते सुरजागड खाणीपर्यंतचा रस्ता आता सुधारित स्वरूपात मंजूर करण्यात आला आहे. या रस्त्याची लांबी ८५.७६५ किलोमीटर ठेवण्यात आली असून हा प्रकल्प महाराष्ट्र राज्य रस्ते विकास महामंडळामार्फत पूर्ण केला जाणार आहे.
या भागात खनिज वाहतूक मोठ्या प्रमाणात होते. कोनसरी येथे सुरू असलेल्या पोलाद प्रकल्पामुळे पुढील काळात ही वाहतूक आणखी वाढणार आहे. त्यामुळे खाणीतील माल बाहेर नेण्यासाठी मजबूत आणि सरळ मार्गाची गरज होती. त्याच पार्श्वभूमीवर हा रस्ता महत्त्वाचा मानला जात आहे. या रस्त्यामुळे उद्योगांना फायदा होणारच, पण स्थानिक भागातही हालचाल वाढण्याची शक्यता आहे.
यापूर्वी फेब्रुवारी २०२४ मध्ये या रस्त्याला ८४.६३८ किमी लांबीस मंजुरी देण्यात आली होती. मात्र, पुढील गरज लक्षात घेऊन रस्त्याची आखणी बदलण्यात आली आणि आता सुधारित ८५.७६५ किमी प्रस्तावाला अंतिम मंजुरी देण्यात आली आहे.
भूसंपादनासाठी २७४ कोटींची मंजुरी, कामाला लवकरच सुरुवात
या रस्त्यासाठी लागणाऱ्या जमिनीच्या भूसंपादनासाठी सरकारने एकूण २७४.२२ कोटी रुपयांची तरतूद केली आहे. यामध्ये सुमारे १५८.२८ कोटी रुपये मूळ रक्कम आणि अंदाजे ११५.९४ कोटी रुपये व्याजाचा समावेश आहे. ही रक्कम उभारण्यासाठी हुडकोकडून कर्ज घेण्यासही मंजुरी देण्यात आली आहे.
महत्त्वाची बाब म्हणजे, या कर्जाची परतफेड वेळेवर व्हावी यासाठी आवश्यक असल्यास राज्य सरकार मदत करणार असल्याचेही स्पष्ट करण्यात आले आहे. त्यामुळे प्रकल्प आर्थिकदृष्ट्या अडकणार नाही, अशी अपेक्षा आहे.
आता पुढील टप्प्यात भूसंपादनाची प्रक्रिया सुरू होणार असून त्यानंतर निविदा प्रक्रिया राबवली जाईल. तसेच या रस्त्याच्या मार्गावर गॅस पाइपलाईनसाठी जागा ठेवण्याबाबतही संबंधित संस्थेशी समन्वय साधण्याचे निर्देश देण्यात आले आहेत.
या रस्त्यामुळे गडचिरोलीतील दुर्गम भागांना जोडणी मिळणार आहे. स्थानिकांना रोजगाराच्या संधी वाढण्यासोबतच आरोग्य आणि इतर शासकीय सेवा पोहोचवणे सोपे होणार आहे.
