✍️ लोकवाणी आवाज संपादकीय टीम
📅 २६ जानेवारी २०२६
 |
| NHM व 15 वा वित्त आयोग अंतर्गत पदभरती प्रक्रियेदरम्यान कागदपत्र पडताळणीसाठी उपस्थित उमेदवारांचे प्रतिनिधीक दृश्य |
राष्ट्रीय आरोग्य अभियान, 15 वा वित्त आयोग तसेच आरोग्य विभाग, जिल्हा परिषद गडचिरोली यांच्या मार्फत CSR निधी अंतर्गत विविध रिक्त पदांची पदभरती प्रक्रिया सुरु आहे. या भरती प्रक्रियेसाठी मोठ्या प्रमाणात अर्ज प्राप्त झाल्यामुळे पदनिहाय यादी तयार करण्यासाठी अतिरिक्त वेळ लागत असल्याची माहिती अधिकृतरित्या देण्यात आली आहे.
यामुळे, यापूर्वी जाहीर करण्यात आलेल्या वेळापत्रकानुसार दिनांक 27 जानेवारी 2026 पासून उमेदवारांचे मुळ कागदपत्र पडताळणी करणे शक्य होणार नाही, असे जिल्हा परिषद गडचिरोलीकडून स्पष्ट करण्यात आले आहे. सदर प्रक्रिया पुढील काही दिवसांसाठी स्थगित ठेवण्यात आली आहे.
संबंधित बातमी वाचा: राष्ट्रीय आरोग्य अभियान (NHM) गडचिरोली भरती २०२६ – १७२ पदांसाठी ऑनलाईन अर्ज प्रक्रिया, पात्रता निकष, आवश्यक कागदपत्रे व संपूर्ण माहिती
NHM, 15 वा वित्त आयोग व CSR निधी अंतर्गत पदभरती संदर्भातील अधिकृत अपडेट
पदभरती प्रक्रियेतील सुधारित वेळापत्रक तसेच कागदपत्र पडताळणीबाबतच्या सविस्तर सूचना लवकरच जिल्हा परिषद गडचिरोलीच्या अधिकृत संकेतस्थळावर www.zpgadchiroli.maharashtra.gov.in
येथे प्रसिद्ध करण्यात येणार आहेत. उमेदवारांनी कोणत्याही अफवांवर विश्वास न ठेवता केवळ अधिकृत वेबसाईटवरील माहितीकडे लक्ष देण्याचे आवाहन करण्यात आले आहे.
यापूर्वी, दिनांक 13 ऑगस्ट 2025 रोजी अर्ज सादर केलेल्या उमेदवारांची तात्पुरती पात्र व अपात्र यादी प्रसिद्ध करण्यात आली होती. त्या यादीबाबत हरकती असल्यास उमेदवारांना विहित कालावधीत आवश्यक कागदपत्रांसह प्रत्यक्ष कार्यालयात अर्ज सादर करण्याची संधी देण्यात आली होती.
प्राप्त हरकतींचा विचार करून उमेदवारांची अंतिम पात्र व अपात्र यादी तयार करण्यात आली आहे. अंतिम पात्र यादीतील उमेदवारांनाच मुळ कागदपत्र पडताळणीसाठी उपस्थित राहण्याची संधी दिली जाणार असून, यासाठी कोणताही स्वतंत्र पत्रव्यवहार केला जाणार नाही.
विहित दिनांक व वेळेत उपस्थित न राहणाऱ्या उमेदवारास गैरहजर समजण्यात येऊन त्यांची उमेदवारी रद्द करण्यात येईल, असेही स्पष्ट करण्यात आले आहे. उमेदवारांनी पुढील सर्व निकाल व अपडेटसाठी जिल्हा परिषद गडचिरोलीच्या अधिकृत संकेतस्थळाला वेळोवेळी भेट देणे आवश्यक आहे.
