✍️ रामकृष्ण बोरुले (लोकवाणी आवाज)
🌐 १२ जानेवारी २०२६
 |
| महानगरपालिका निवडणुकांच्या पार्श्वभूमीवर महाराष्ट्रात 13 ते 16 जानेवारीदरम्यान चार दिवसांचा ड्राय डे लागू करण्यात आला आहे. |
महाराष्ट्रात 29 महानगरपालिका निवडणुकांचा प्रचार अंतिम टप्प्यात पोहोचला असून, राज्यभर राजकीय हालचालींना वेग आला आहे. सर्वच प्रमुख पक्षांकडून सभा, रॅली, रोड शो यांचा जोर वाढला असताना, निवडणूक प्रक्रियेत शांतता आणि पारदर्शकता राखण्यासाठी राज्य शासनाने महत्त्वाचा निर्णय घेतला आहे.
राज्य शासनाने 29 महानगरपालिका क्षेत्रात चार दिवसांचा ड्राय डे लागू करण्याचे आदेश जारी केले आहेत. या कालावधीत दारू विक्री करणारी सर्व दुकाने, बार तसेच परमिट रूम पूर्णपणे बंद ठेवण्याचे निर्देश देण्यात आले आहेत. यासोबतच सार्वजनिक ठिकाणी मद्यपान करण्यासही सक्त मनाई करण्यात आली आहे.
महाराष्ट्रातील 29 महानगरपालिकांसाठी
15 जानेवारी 2026 रोजी मतदान होणार आहे
16 जानेवारी 2026 रोजी मतमोजणी व निकाल जाहीर करण्यात येणार आहेत
या पार्श्वभूमीवर महसूल विभागाच्या मार्गदर्शनाखाली आणि निवडणूक आयोगाच्या सूचनेनुसार हा निर्णय घेण्यात आला आहे.
हा ड्राय डे नियम 29 महानगरपालिका क्षेत्रापुरताच मर्यादित असेल. यामध्ये मुंबई, पुणे, ठाणे, नाशिक, नागपूर, औरंगाबाद (छत्रपती संभाजीनगर) यांसह राज्यातील सर्व प्रमुख महानगरपालिकांचा समावेश आहे.
राज्य शासनाच्या आदेशानुसार
13 जानेवारी ते 16 जानेवारी 2026 या चार दिवसांत दारू विक्रीवर बंदी राहणार आहे.
ड्राय डे अंमलबजावणीचे वेळापत्रक
मंगळवार, 13 जानेवारी 2026 – संध्याकाळी 6 वाजल्यापासून दारू विक्री बंद
बुधवार, 14 जानेवारी 2026 – संपूर्ण दिवस बंद
गुरुवार, 15 जानेवारी 2026 – मतदानाचा पूर्ण दिवस
शुक्रवार, 16 जानेवारी 2026 – मतमोजणी पूर्ण होईपर्यंत बंदी कायम
ड्राय डेच्या नियमांची प्रभावी अंमलबजावणी करण्यासाठी पोलीस प्रशासन आणि महसूल विभाग संयुक्तपणे कारवाई करणार आहेत. दारू विक्रेत्यांना याबाबत आधीच सूचना देण्यात आल्या असून, नियमांचे उल्लंघन केल्यास संबंधितांवर कायदेशीर कारवाई केली जाणार आहे.
निवडणुका शांततेत, निर्भय आणि पारदर्शक वातावरणात पार पडाव्यात, यासाठी ही खबरदारीची उपाययोजना असल्याचे प्रशासनाने स्पष्ट केले आहे.
