✍️ लोकवाणी आवाज टिम
📅 ३ फेब्रुवारी २०२६
 |
| India Post GDS Recruitment 2026: 28,740 जागांची भरती; परीक्षा नाही, निवड 10वी गुणांवर |
सरकारी नोकरीची तयारी करणाऱ्या लाखो तरुणांसाठी एक महत्त्वाची अपडेट समोर आली आहे. भारतीय टपाल विभागाने 2026 साठी ग्रामीण डाक सेवक (GDS) पदांची भरती प्रक्रिया जाहीर केली असून यामध्ये देशभरात मोठ्या प्रमाणावर रिक्त जागा भरण्यात येणार आहेत. 10वी उत्तीर्ण उमेदवारांसाठी ही भरती विशेष ठरणार आहे, कारण निवड प्रक्रियेत कोणतीही लेखी परीक्षा किंवा मुलाखत ठेवण्यात आलेली नाही.
टपाल विभागाच्या या भरती मोहिमेत देशभरातील 23 पोस्टल सर्कलमध्ये एकूण 28,740 पदे भरली जाणार आहेत. त्यामुळे कमी शैक्षणिक पात्रता असतानाही सरकारी सेवेत प्रवेश करण्याची संधी अनेकांना मिळू शकते. ऑनलाइन अर्ज प्रक्रिया सुरू असून इच्छुक उमेदवारांना 16 फेब्रुवारी रोजी सायंकाळी 5 वाजेपर्यंत अर्ज सादर करता येणार आहे.
संबंधित बातमी वाचा: NHM 15th Finance Commission गडचिरोली भरती अपडेट
या भरतीची निवड पद्धतही उमेदवारांसाठी दिलासादायक आहे. कारण दहावीच्या गुणांवर आधारित मेरिट यादीतूनच उमेदवार निवडले जाणार आहेत. त्यामुळे ज्यांना स्पर्धा परीक्षा देणे कठीण जाते, अशा उमेदवारांसाठी हा एक चांगला पर्याय ठरू शकतो.
GDS भरती 2026: पदांची माहिती, पात्रता आणि निवड पद्धत
या भरतीअंतर्गत ग्रामीण डाक सेवक (GDS) यासोबत शाखा पोस्ट मास्टर (BPM) आणि सहाय्यक शाखा पोस्ट मास्टर (ABPM) अशी पदे उपलब्ध आहेत. अर्जदाराने 10वी उत्तीर्ण असणे आवश्यक असून निवड ही केवळ दहावीच्या गुणांवर ठरेल. उमेदवारांचे वय किमान 18 वर्षे असावे आणि कमाल 40 वर्षांपर्यंत पात्रता मान्य केली जाणार आहे.
कामाच्या स्वरूपानुसार उमेदवाराकडे संगणकाचे मूलभूत ज्ञान असणे आवश्यक मानले जात आहे. तसेच अनेक भागांमध्ये टपाल वितरणासाठी सायकल चालवता येणेही आवश्यक अट म्हणून नमूद करण्यात आले आहे.
अर्ज शुल्क, वेतन आणि ऑनलाईन अर्ज प्रक्रिया
अर्ज शुल्क सामान्य, OBC आणि EWS प्रवर्गासाठी 100 रुपये निश्चित करण्यात आले आहे. मात्र SC, ST आणि महिला उमेदवारांना कोणतेही शुल्क भरावे लागणार नाही. निवड झाल्यानंतर उमेदवारांना पदानुसार वेतन मिळणार असून GDS आणि ABPM पदांसाठी दरमहा 10,000 ते 24,470 रुपये वेतन दिले जाईल. तर BPM पदासाठी दरमहा 12,000 ते 29,380 रुपये वेतन मिळण्याची शक्यता आहे.
अर्ज करण्यासाठी उमेदवारांनी indiapostgdsonline.gov.in या अधिकृत पोर्टलवर जावे. प्रथम नोंदणी करून लॉगिन तयार करावे, त्यानंतर अर्ज फॉर्म भरून आवश्यक कागदपत्रे अपलोड करावीत. शुल्क लागू असल्यास ऑनलाइन पद्धतीने भरून अर्ज सबमिट करावा. अर्ज सबमिट झाल्यानंतर त्याची कॉपी/प्रिंट सेव्ह करून ठेवणे पुढील प्रक्रियेसाठी उपयुक्त ठरेल.
