✍️ लोकवाणी आवाज टिम
📅 १५ फेब्रुवारी २०२६
 |
| शंकर पट्टा कार्यक्रमाचे उद्घाटन करताना मान्यवर व ग्रामस्थ उपस्थित – मौजा पोर्ला |
ईश्वरजी तिवाडे:- गडचिरोली तालुक्यातील Porla येथे दि. १४ फेब्रुवारी ते १८ फेब्रुवारी २०२६ रोजी पारंपरिक शंकर पट्टाचे भव्य आयोजन करण्यात आले आहे. गावातील पट्टप्रेमी नागरिकांनी एकत्र येत हा सांस्कृतिक उपक्रम उभारला असून उद्घाटन सोहळा उत्साहपूर्ण वातावरणात पार पडला. सकाळपासूनच गावात सणासारखी लगबग आणि उत्सुकता पाहायला मिळत होती.
उद्घाटन प्रसंगी वन विभागाचे अधिकारी, ग्रामपंचायत सदस्य,तंटामुक्त समितीचे पदाधिकारी, आणि गावातील प्रतिष्ठित नागरिक मोठ्या संख्येने उपस्थित होते. अश्या पारंपारिक खेळाचे आणि स्थानिक संस्कृती जपण्यासाठी अशा उपक्रमांची गरज असल्याचे मत उपस्थितांनी व्यक्त केले. ग्रामस्थांच्या उत्स्फूर्त सहभागामुळे कार्यक्रमाला विशेष रंगत प्राप्त झाली.
👉 संबंधित बातमी वाचा: पोर्ला येथील गजानन महाराज प्रगट दिन कार्यक्रम सविस्तर वाचा
या वेळी फॉरेस्ट ऑफिसर पाचभाई साहेब, राऊंड ऑफिसर, ग्रामपंचायत सदस्य अजय चापले व अनिल चापले,तंटामुक्त समितीचे अध्यक्ष गोपालजी गेडाम, सामाजिक कार्यकर्ते निलकंठ संदोंकर, माजी सरपंच दिपक चौधरी व परसराम बांबोळे, तंटामुक्त समिती सदस्य ईश्वर तिवाडे, पोलिस पाटील हितेंद्र बारसागडे, वनरक्षक शिवनकर साहेब, राजू भोयर, शंकरपट्टाचे अध्यक्ष पांडुरंग भोयर तसेच गुरु पाटील म्हशाखेत्री आणि इतर नागरिक उपस्थित राहून आयोजकांचे कौतुक केले.
परिसरात परंपरा जपणारा उपक्रम
शंकर पट्टा हा स्थानिक परंपरेशी जोडलेला महत्त्वाचा सांस्कृतिक उपक्रम मानला जातो. या आयोजनामुळे तरुण पिढीला पारंपरिक खेळांची ओळख होते आणि गावातील सांस्कृतिक वारसा पुढे नेण्यास मदत मिळते. आयोजकांनी सुरक्षिततेची काळजी घेत नियोजनबद्ध पद्धतीने कार्यक्रम पार पाडला.
गावातील ज्येष्ठ नागरिकांनी अशा उपक्रमांचे स्वागत करत परंपरा टिकवून ठेवण्याची गरज अधोरेखित केली. सामूहिक सहभागातून गावात सकारात्मक वातावरण निर्माण होते आणि सामाजिक ऐक्य अधिक मजबूत होते, असे त्यांनी सांगितले.
आयोजन समितीने सर्व पट्टप्रेमी बांधवांनी कार्यक्रमाचा आनंद घ्यावा व सहभागी व्हावे, असे आवाहन केले आहे. स्थानिक पातळीवर नागरिकांनी पुढाकार घेतल्यास अशा सांस्कृतिक परंपरांना अधिक बळ मिळेल, असा विश्वास व्यक्त करण्यात आला.
